Н. Емин Џијан и Јуан Аткинс со Белградска филхармонија на „ДЕВ9Т“

Еден од најдобрите македонски музички уметници, Џијан Емин, ќе гостува во Белград, каде што на 14 јуни ќе настапи како диригент со Белградскиот симфониски оркестар и со кумот на техно музиката, американскиот диџеј и продуцент Јуан Аткинс. Овој несекојдневен музички настан ќе се одржи во Старата Циглана, во рамките на второто издание на фестивалот „ДЕВ9Т“.

Диригентот и композиторот Џијан Емин е задолжен и за оркестрацијата на 11-те композиции за симфониски оркестар кои премиерно ќе бидат изведени токму во Белград, а покрај Јуан Аткинс, кој ќе настапи како солист на клавијатури и електроника, на концертот ќе гостува и вокалниот солист Милан Ариел.

Овој иновативен проект се најавува веќе подолго време во белградските медиуми и ќе биде централен настан на фестивалот „ДЕВ9Т“, случување кое, како што е опишано, ги збира сите оние кои ја сакаат уметноста, оние кои непрекинато творат и креираат.

Новиот проект на Џијан Емин и продукциската куќа „Излет Мјузик“ е своевидно продолжение на претходниот мошне успешен проект со познатиот диџеј Дерик Меј кој се одржа во Охрид  заедно со Македонската филхармонија и со кој беа остварени и неколку значајни гостувања во Гент (Белгија), Париз и Ница (Франција), Детроит (САД) и Мелбурн (Австралија). Синергијата на електронската и класичната музика и овој пат е генерален опис на музиката која што ќе може да ја слушне белградската публика во Старата Циглана.

„Се надеваме дека и овој нов проект ќе имаме можност да го промовираме на различни сцени низ светот, а целта е да допреме до вистинските љубители на т.н. ’андерграунд‘ звук и до љубителите на добрата музика воопшто“, велат од „Излет Мјузик“.

Џијан Емин истакнува дека концептот на овој проект во основа е ист како и претходниот со Дерик Меј. „Ќе имаме можност да изведеме електро-акустичен концерт поткрепен со високо квалитетно озвучување и светлосни и визуелни ефекти. Разликата е во самата музика која носи различен тематски материјал која мене ме инспирира на сосема друг начин од она што претходно го работев, вклучувајќи ги и актуелните случувања во нашата држава кои секако имаат огромно влијание врз работата на секој уметник“, вели Емин. Тој додава дека сега, иако композициските техники на неговата работа се слични, има новина во инструментацијата, односно обоите и фаготите се заменети со саксофони кои носат сосема нов звук и со тоа флексибиноста на дувачката секција е на повисоко ниво. „Мислам дека ќе имаме динамичен концерт, со големи контрасти и различни бои и се надевам дека публиката ќе може да и се препушти на енергијата која ја носи самата музика“, вели Емин.

Техно магот, диџејот и продуцентот од Детроит, Јуан Аткинс, заедно со Дерик Меј и Кевин Сандерсон е член на познатата „Белевил“ тројка, екипата која директно е задолжена за создавањето на Детроит техно сцената. Аткинс го нарекуваат кум на поимот „техно“ и негова е заслугата на целокупното музичко шаренило со своите поджанрови кое денес се појавува под тоа име. Зад себе има повеќе од 20 изданија и 30 годишна кариера со многубројни настапи ширум светот. Денес, Аткинс е поим за вистински уметник за сите оние кои ја почитуваат електронската музика.

Share Button
dare

dare

Уредник на муабет.мк

Напишете коментар

Вашата адреса за е-пошта нема да биде објавена.

This site uses Akismet to reduce spam. Learn how your comment data is processed.